Warrior-For-Christ

Ek stem saam met Anton van Niekerk (Geloof sonder Sekerhede, Lux Verbi, 2005) as hy skryf dat geloof vandag te veel van 'n teoretiese saak geraak het instede van 'n praktiese lewenswyse. Geloof is immers om prakties te lewe en die Woord die handleiding van die lewe. Dit gaan vir my werklik daaroor om jou naaste lief te hê, om te leer om te vergewe, om God onvoorwaardelik te vertrou, om die versekering te hê dat Jesus Christus daar is vir my in alle omstandighede, om dankbaarheid te betoon vir al die seëninge wat ek so onverdiend uit Sy hand ontvang. Dit is so dat 'n mens die Bybel kan bestudeer tot dit by jou ore uitloop en dae lank kan redeneer en debateer oor die interpretasie en toepassing van skrifgedeeltes, maar sonder die praktiese toepassing van die Woord in jou alledaagse lewe sal jy weinig baat vind daarby. Ek is nie 'n teoloog of filosoof nie en kan nie roem dat ek enige spesiale kennis oor die Woord van God het nie, maar ek vind dat Hy deur die Heilige Gees daaglik vir my stukkies van Sy Woord oopbreek wat my help om prakties te groei in die geloof. Dit is dan om hierdie rede alleen dat ek hierdie blog begin het - om daardie insigte vas te lê in die hoop dat iemand anders ook daarby baat sal vind. Dit is nie 'n poging om teksgedeeltes uit te lê nie of verklaar nie, maar slegs my persoonlike interpretasie aangaande die praktiese toepassing daarvan in my eie lewe. Ek wil u uitnooi om deel te neem en u persoonlike ervarings as kommentaar hier te pos en op dié manier kan ek weer op my beurt ook van u leer.